បាត់ដំបង៖ បើតាមលិខិតបង្គាប់ការផ្អាកការងារ របស់លោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបង ដែលទទួលបាននៅព្រឹកថ្ងៃទី១៣ ខែសីហា ឆ្នាំ២០២១នេះ លោកវរសេនីយ៍ឯក យឹម វិចិត្រ មេបញ្ជាការ នៃវរសេនាតូចនគរបាលការពារព្រំដែនគោកលេខ៨២៣ ចំណុះស្នងការដ្ឋាននគរបាលខេត្តបាត់ដំបង ឲ្យចូលបម្រើការងារក្នុងអង្គភាពដើមវិញ ក្រោយប្រែនូវកំហុសឆ្គងរបស់ខ្លួន និងអនុវត្តឱ្យបានត្រឹមត្រូវតាមវិន័យរបស់កងកម្លាំងនគរបាលជាតិ។
សូមជម្រាបថា លោកវរសេនីយ៍ឯក យឹម វិចិត្រ ត្រូវបានថ្នាក់លើផ្អាកការងារបណ្ដោះអាសន្ន ក្រោយប្រើប្រាស់អំពើហិង្សាលើកូនចៅរបស់ខ្លួន និងមានរឿងមិនប្រក្រតីផ្សេងទៀត ស្រាប់តែពេលនេះត្រូវបានអនុញ្ញាតឲ្យកាន់ តួនាទីដូចដើម ជាហេតុនាំឲ្យមន្រ្តីនគរបាលក្រោមឱវាទមិនពេញចិត្តនោះឡើយ។
យោងតាមលិខិតរបស់ស្នងការនគរបាលខេត្តបាត់ដំបង លោកឧត្តមសេនីយ៍ទោ សាត គឹមសាន បានបញ្ជាក់ថា «ត្រូវបានចាត់បញ្ជូនលោកវរសេនីយ៍ឯក យឹម វិចិត្រ អត្តលេខ ០៧៧៤៦ ឋានៈ មេបញ្ជាការ នៃវរសេនាតូចនគរបាលការពារព្រំដែនគោកលេខ៨២៣ចំណុះស្នងការដ្ឋាននគរបាលខេត្តបាត់ដំបងឲ្យចូលបម្រើការងារក្នុងអង្គភាពដើមវិញ»។
លិខិតបង្គាប់ដដែលបានបញ្ជាក់ថា «លោកវរសេនីយ៍ឯក យឹម វិចិត្រ ត្រូវកែប្រែនូវកំហុសឆ្គងរបស់ខ្លួន និងអនុវត្តឱ្យបានត្រឹមត្រូវតាមវិន័យរបស់កងកម្លាំងនគរបាលជាតិ។ ក្នុងករណីនៅតែប្រព្រឹត្តកំហុសឆ្គងលើកទីពីរទៀតនោះ ស្នងការនគរបាលខេត្តបាត់ដំបងនឹងមានវិធានការជាក់ស្តែងតាមវិន័យរបស់កងកម្លាំងនគរបាលជាតិ»។
គួរំលឹកផងដែរកាលពីព្រឹកថ្ងៃទី ៤ ខែមិថុនា ឆ្នាំ ២០២១កន្លងមកនេះ ស្នងការខេត្តបាត់ដំបងចេញលិខិតបង្គាប់ការមួយសម្រេចដកលោក យឹម វិចិត្រ មេបញ្ជាការវរសេនាតូច នគរបាលការពារព្រំដែនគោកលេខ ៨២៣ ដោយផ្អាកការងារជាបណ្តោះអាសន្ន និងប្រគល់ភារកិច្ចបណ្តោះអាសន្ន ជូនលោក វរសេនីយ៍ទោ មាស មឿន ដែលជាមេបញ្ជាការរងឲ្យទទួលដឹកនាំវរសេនាតូច នគរបាលការពារព្រំដែនគោក លេខ ៨២៣ រហូតដល់មានការសម្រេចជាថ្មី៕
0 Comments